سلام عليكم ورحمة الله وبركاته
كل سنة وانتم طائعين ...ربنا يتقبل منا صيامنا .. ويعتق رقابنا من النار
انا كاتبة البوست ده لانى اتعرضت لموقفين بيدوروا حول نفس النقطة ...
كنت راكبة باص من الجيزة للعجوزة .. وكان قبل الفطار بكام ساعة والمواصلات صعبة .. ومفيش ولا تاكسى ولا باصات كتير ...
المهم ركبت الباص مفيش اماكن غير فى اخر الباص .. الكنبة الاخيرة دى ... رجعت علشان اقعد وبالفعل قعدت ..لاقيت جروب بنات داخلين 4 بنات.. داخليين يزعقوا .. ...اندهشت .. قولت اكيد فى حاجة حصلت لاقتهم بتزعقوا فى اى راجل قاعد .. مكنش فى اى حد
واقف اساسا لسة ... بيزعقوا حتى للسائق!!
منهم من ترتدى النقاب والاخريات اسدالات...ولحسن حظى مفيش مكان فاضى غير جنبى ...قعدوا جنبى ..الاربعة ..على وجهم غضب لا اتحمله .. بس للامانة خفت منهم ...قولت مش هفطر النهاردة ...قعدوا جنبى طلعوا مصاحف وقعدوا يقروا فيها ... وفاجاة كلهم سابوا المصاحف وفتحوا الشنط انا بدات اقلق ... طلعوا الاجرة ولاقيت واحدة اخدتهم منهم كلهم ورمتهالى على رجلى ..
اديلوا يا انسة ؟؟.. انا مش فاهمة حاجة ... قولتلها لا انتى بتدفعى وانتى نازلة .. وكانى شتمتها ...قالتلى انتى عايزنا نتعامل معاهم !!!
فانا فهمت القصة ... الجنس الاخر بنسبلهم محظور تماما ... قولتلها لا متتعمليش اديله الفلوس بس .. صرخت فى وشى .. مخلاص يا انسة ..قولتلها خلاص ياافندم :D
زادنى الفضول اعرف قصتهم ... حاولت اكلم احدهمن .. قالتلى وانتى مالك :D
راحت ادتلها فلوسهم وقولتلها مش هدفعلكم .. ادفعى انتى .. ده تعامل للضرورة.... اخدت الفلوس وراحت اول كرسى ... فيه بنت ادتها الفلوس على ماجت كان واحد قعد مكانها وكان يوم ما يعلم بيه الا ربنا...
قعدت تقول استغفروا الله ..استغفر الله ...واللى قعد جنبها زعقتله قوووم .. انا حسيت انى فى بيت الرعب ... يا بنتى فى ايه .. احنا بنات محمد.. احنا حور الجنة ... مبنتعملش مع الرجال .. وحاجات غريبة كدة ... وقفوا الباص ونزلوا ...
ولحسن حظى كان جه شارع نوال وكنت هنزل انا كمان ... دخلوا نفس الشارع .. بيبصولى بطريقة غريبة جدا ماعرفش ليه ...
راحت واحدة مقربالى.. لطفك يارب ... انتى بتعاملى مع رجال ...ايوة بتعامل عادى ...طالما ملتزمة بالحدود مفيش مشاكل ..
قالتلى استغفر الله استغفر الله ...قولتلها طيب عايزة اسمعكم .. قالتلى مش مستحية من ربنا ...ترتدى الخمار وتتعاملى مع الرجال
وسابونى ومشيوا .. واختلفت طرقنا ...
حتى الان كل ماافتكر الموقف ده اتخنق...الناس دى فاهمة الدين غلط ...
الاسلام مش كدة يا جماعة ... التعامل موجود عند اللزوم .. مفيش مشاكل ... ده مش التزام خالص ... ده اسمه ايه مش عارفة..
البنت الملتزمة .. بنات محمد بجد .. لازم بكون شخصيتهم موجودة ...تتعامل عادى .. طالما بتلتزم بغض البصر .. والتعامل بحدود .. وللضرورة .. فين المشكلة ؟
احنا عايزين نحبب الناس فى الاسلام يبقى مش بالشكل ده خالص ... انتى ملتزمة .. حافظة للقران ... ناجحة .. بتتعاملى بكل احترام ..
عايزين نهضة ولسة فى ناس كدة .. كل مافتكر الموقف ده .. عرفت ليه الغرب فاكرين اننا لسة بنركب ناقة ...
كنت سمعت د. راغب السرجانى بيتكلم عن نفس الموضوع .. احنا مش كدة ...ربنا يهدى
الموقف التانى ..
كنت فى افطار جماعى ... وكان فى مسافة بين اماكن البنات والرجال .. مسافة كويسة
لاقيت بنات لالا المسافة قريبة .. هى ايه اللى قريبة ؟... مهو ممكن يكون فى فاصل بينك وبينهم 100م وعادى جدا ...لو 6 متر وعندك غض البصر والفهم الصحيح خلاص ... يعنى لو رحتى تاكلى فى مكان وجنبك طاربيزة عليه ناس بياكلو رجال مثلا هتقومى .؟
ليه مبحسش بقوة البنات كدة ... انتى وقرانك ورسولك وسعيك لنهضة امتك ... يا ستى اقعدى وادى ظهرك ليهم .. ذوق يعنى بس مش مشكلة ...بس بلاش بقى حركات ملهاش لازمة ...اعرف بنت من اللى عملت كدة اساسا عندها مليون حاجة واقعة والاولى انها تصلحها ...
ليه معندناش زى سيداتنا سمية بنت خباط ...واسماء بنت ابى بكر ..وامامة بنت ابى العاص...وخديجة بنت خويلد
فى قوتهم .. والتزامهم ..
انتى هتبقى ام .. هتطلعى وتربى زى صلاح الدين ... قظز ...هتربى بنات وشباب محمد ...
ممكن اكون متحاملة شوية ,,, اعذرونى لضيقى الشديد
وغفر الله للجميع
12 comments:
طبعاً انتي عارفه انا موت من الضحك وانا بقرأ البوست ده
وخصوصا في الموقف الاول لاني عارفه الموقف التاني
مش هعلق على المواقف لانهم لا يعنوني بشىء
تعليقي ليكي انتي
انك تشغلي بالك وتكتبي بوست بحاله عن حالتين زي دول اينعم الموقف غريب جدا بس عن نفسي ضحكت عليه مش اتعصبت او كنت هعيط
ميستاهلش اني اعمله المساحة ديه
الي مش عايزه تتعامل مع رجال متخرجش من بيتها احسنلها واحسن للناس اللي بره كمان
واللي مش عايزه تحضر افطار مختلط مكنتش تحضرمن الاول
لان المسافة مش هي العامل الوحيد اني ابص للشخص ده او غيره ممكن تكوني واقفه بتتكلمي معاه مفيش ما بينكو خطويتن بس متعرفيش شكله
لان العامل هو حيائك وأدبك والتزامك بتعاليم الله
متخليش موافق زي ديه تأثر عليكي لان اللي هما بيقوله ده عمره ما هيطبق دلوقتي بل بالعكس معاملات الشباب مع البنات بتزيد وبالذات الملتزمين مش لحاجه وحشه لا ابداً بتكون ما بينهم مشاريع واشياء خيرية بتفيد المجتمع كله وفي نفس الوقت بيحافظو على الحدود ما بينهم
كبري مخك وسيبك من الحاجات ديه
السلااااااام عليكم
مبدئيا .. اتفق معكي تمامااااااااااا
أما بالنسبة للموقفين اللي انتي ذكرتيهم ..
فبالنسبة للاول .. بجد يعني .. الحمد لله اني مكنتش معاكي .. كان زماني دلوقتي في سين وجيم
:D
يعني سبحان الله .. 4 بنات .. خارجين مع بعض .. بيعرضو نفسهم بعلمهم .. لطرق .. ومواصلات ..
واعتقد ان ده شئ طبيعي جدا .. يعني انا مش فاهمه .. ماهو من دائما وهي الطرق كده .. ولا هما بيطالبنو بطرق ليهم
لا بجد اتغظت اوي .. وهسكت احسن دلوقتي
__
أما بالنسبة للموقف التاني .. فهو ده اللي يضحك .. ويستدعي الوقوف بجد .. الوقوف علشان نتسائل _ ليه فيه ناس بتعمل كده ؟؟_ يعني بجد .. يا تري ايه الهدف من الموقف ده ؟؟
حد جاي مكان .. وعارف تماما المكان ده شكلة ايه .. وفيه مين .. وعلي الرغم من كده جيه .. علشان يبص علي الناس .. ويثبت وجوده .. وبعدين ينصرف
ويا ريتة اصلا بص من بعيد .. دة قعد وسلم وكل حاجه .. وقبل الافطار بشوية مشي .. يعني سبحان الله
يا تري مفكرش ان ديه حاجه ممكن تهين الناس الموجوده ؟؟؟
______
واختلف5 معاكي يا سلوي في اننا المفروض نكبر .. الناس ديه يا بنتي بنكون منتظرين منهم تصرفات غير كده خااالص
يعني هما بيكونو بيمثلو الزي اللي هما متمسكين فيه ..فاحنا بننتظر انهم يمثلوة علي اكمل وجة
لو مش لشئ .. فيكون لربنا .. علشان يكونو علي الاقل بيدعو الناس اللي مش ملتزمة للالتزام
والله الموقف الاول انا قولت انهم هيطلعو رشاش ولا حاجه من الشنطه وهيموتو كل الرجاله
فعلا هناك اناس كثيرون رجال كانو ام نساءء لا يفهمون معنى الدين صحيح
ربنا يهديهم ..ويشفيهم
أغلب الناس اللي من النوع بيكون السبب الجهل والكبت وغالبا الكبت لان بيكون عندهم رغبات ميقدروش يعبروا عنها الا بالطريقة العكسية دي
وافضل حاجة يروحوا لطبيب نفسي افضل
بجد ربنا يهديهم
أنا فعلاً مستغرب من الموقف الأول , ومش عارف اذا كانوا هما لا يتعاملون مع الرجال طيب ليه بيركبوا الباص يركبوا تاكسي أفضل أو أساساً اذا كان ده اسلوبهم فى الحياة لماذا خرجوا من بيوتهن ؟!!!!!!
عفواً الاسلام ليس كذلك , فقديماً كانت معاملات الرجل مع المرأة فى عهد الدولة الاسلامية مستمرة وفى حدود الاحترام المتبادل و كل منهما يدرك دينه جيداً و فاهم الصح من الخطأ .
يا رب أصلح أحوال رجال وبنات الاسلام ويفهموا الدين صح وليس بمزاجهم .
السلام عليكم ورحمه الله وبركاتة
أختى فى الله رنين الصمت مستغربة قوى من الموقف الأول تعرفى إية سر إستغرابى أن البنات اللى بتبقى ملتزمة قوى كدة دايما بيبقى سلوكها جميل علشان السلوك دة بيعتبر دعوةللأخرين للإلتزم
وأنا مش مع الرأى أن البنات إللى عايزة تتجنب الإختلاط بالرجال إنها تجلس فى بيتها أفضل
مع الأسف المجتمع هو اللى فرض علينا دة يعنى فعلا لو كنا ملتزمين بالشريعة الإسلامية كنا عملنا باص للرجال وباص للنساء كنا عملنا مكان لعمل الرجال ومكان أخر لعمل النساء بدل الإختلاط الجامد دة بس طالما إن إحنا فى مجتمع بيفرض علينا دة فلازم نتحاشى أى إختلاط بقدر الإمكان وبإسلوب مهذب
فى نقطة تانية
بالنسبة للموقف الثانى أنا من رأى أن إللى بعدت كدة هى مغلطتش هى بتحاول بقدر الإمكان إنها تبعد شئ هى شيفاة غلط وإن كان الأولى طبعا إنها متحضرش الإفطار دة من أساسة
فى نقطة أخيرة مش عارفة لية لما قرأتها زعلت وأتمنى أن صدرك يتسع لكلامى
وإنك شايفة إنها البنت صاحبة الموقف الثانى فيها أشياء كتييرة غلط أولى إنها تتصلح وفيها إية أنها تصلح الموقف دة وأكيد طالما إنها فيها خير أكيد مع الوقف بقية الحاجات التانية هتتصلح مش عايزين نكون بنعاقيب الناس الملتزمة إنهم إلتزمو بذكر عيوبهم
أنا أسفة إنى طولت على فكرة أنا بحترمك جدا ومتابعة مدونتك من فترة
ربنا يكرمك ويرزقك الفردوس الأعلى من الجنة
أختك فى الله
أبرار
انتو بتتعاملوا مع رجال ؟؟؟؟؟
أستغفر الله العظيم !!
أكيد بتتعاملو كمان مع آباءكم وإخوانكم ومدرسيكم والبائعين والسائقين
!!!!
---
المشكلة إن العبادة بلا علم كارثة
لأن العابد الجاهل لا يشط فحسب ، وإنما يصد غيره
"ولو كنت (فظا) غليظ القلب لانفضوا من حولك"
دولا حيربوا الرعب
اومال هو بنلادن جيه منين؟
ربنا يستر علينا
تحياتي من ماناساس البلد
للاسف هم يضحك وهم يبكي
استغربت اوى ان النماذج دي لسة موجودة
سبحان الله
ربنا يهديهم يارب
قلْ هَلْ نُنَبِّئُكُمْ بِالْأَخْسَرِينَ أَعْمَالًا - الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا
صدق الله العظيم
ربنا يسترها علينا كلنا اللهم ارزقنا الفهم الصحيح
آمين
لا حول ولا قوة الا بالله
لا مش كدة خالص
هممم
الفكرة تستحق المناقشة
الدين بين الإفراك والتفريط
ديننا دين وسطية
بصي يا ستي .. لو كان فعلا زيما قلتي كده تعاملهم وفكرهم بالشكل ده فده أكيد فيه تشدد زيادة
لكني حقولك حاجة مهمة .. لو واحد شاف واحد بيغرق في البحر .. وبعد كده كل ما يشوف البحر يخاف ويحرص جامد .. حتقولي ايه ؟ .. متغاظة منه .. ولا حتشعري بالشفقة أو بإنك متفهمة ليه هو خايف من البحر بالدرجة الكبيرة دي وتحاولي ترجعي ثقته بالله وعلاقته الصحيحة مع البحر !!
أكيد فهمتي أنا أقصد ايه بكلامي
هو ده بالظبط :)
Post a Comment